A Bucciata Bastiaccia: una manifestazione di prestigiu internaziunale

«Andemu à facci una bucciata!» Quantu volte l’avemu intesa è a sentimu sempre in particulare indè à statine. A bucciata, un ghjocu chì adunisce, chì mette in allegria i participenti è e piazze di i paesi l’estate. E l’inguernu quande lu si hè al menu quattru, e bocce rompenu u silenziu di i paesi spenti. Facci una bucciata è po dopu beghje si un’aperitivu sottu à e fronde. Prima, u latu marinu di a piazza Santu Niculà in Bastia ghjera riservatu à i bucciatori. Inguernu cume estate battianu a terra di e so bocce, è spessu fin’à tardi indè a notte. Avà si sò tramudati in Toga, piazza di a gara o in Lupinu induve un bellu terrenu cupertu è alluminatu l’accoglie.

À e bocce ci ghjocanu giovani è vechji, omi è donne è ancu i zitelli. Un c’hè bisognu di una furmazione speziale, ma di pratica, di bon sensu è, si capisce, un po’ di precisione. E bocce, un ghjocu chi ùn costa tantu sell’un ghjè à comprà di un paghju, è tempi fà ghjeranu i cafiteri chi l’imprestavanu. In Bastia cume indè d’altre cità di Corsica è d’altrò ci eranu loghi di Bucciate sempre affiancati di un cafè. U bar di u Prado in Lupinu ne era unu, è ghjè sempre. In stu locu hè nata a bucciata bastiaccia poi l’internaziunale Pierrot Lamperti di u nome di u so creatore. A u Prado, Pierrot Lamperti passiunatu di bocce poi campione, urganizava ogni estate un bellu cuncorsu lucale, poi l’idea hè nata d’ingrendà u “zitellu” incù l’aiutu di a municipalità è di sponsors impurtenti cume a Corsica Linea.

Da bucciatina hè diventata una bucciatona. Durente cinque ghjorni (st’annu di u 21 à u 25 agostu) a Piazza Santu Niculà si muta in un vastu terrenu di bocce. Si ghjoca sottu à u sguardu di Napuleone, à fiancu di u chioschu à musica o à l’ombra di a coppia (mamma è figliolu) di u munimentu à i morti. A bucciata hè apert’ à tutti è d’altronde u primu cuncorsu e statu quellu di e famiglie, poi quellu feminile, seguitatu da e persunnalità cume u merre Petru Savelli è l’anzianu capitanu di u sporting Orlanducci (e nostre foto), è d’altri capizzoni lucali. In fine a dumenica ghjè u ghjornu di i cuncorsi naziunali è internaziunali maschile è feminile (per a prima volta st’annu), incù a participazione di campioni venuti di parechji paesi è di a squadra di Francia. Sta 8esima edizione ghjè stata vinta da a squadra nizzarda cumposta da Michael Bonetto, Ludovic Montero è Basil Jackel. Oramai Bastia incù à so Bucciata s’hè alzata à un rangu di prestigiu indè e cumpetizione di stu ghjocu chi ghjè diventatu una pratica spurtiva di altu livellu.

Petru Luigi Alessandri