A catastrofa a più maiò accaduta in Francia inde un stadiu spurtivu. Stu 5 maghju di u 1992 a meza finale di a Cupa di Francia di ballò uppunìa a squadra di Marseglia à quella di Bastìa. U stadiu ùn ghjera abbastanza grande per accoglie e millaie di tifosi di e duie squadre. Si pigliava cusì a decisione di custruì, di fretta, una tribuna. Troppu di fretta. A disgrazia s’aprìa quì. A gioia si mutò in dolu.
Durente anni é anni, a Francia facìa finta di scurdassi di stu drama. L’autorità spurtive stavanu sorde é u guvernu mutu. Prima di tuttu ci tuccava à prutegge l’interessi materiali di u football.
Ghjera senza cuntà incù a vuluntà, a determinazione, di u Culletivu di e vittime natu subitu dopu a strage. Oghje a so vittoria ùn ghje colma. Se u Guvernu ha cedutu nanta a ricuniscenza di u drama di Furiani cume drama naziunale ùn ghje nancu d’accunsentu per fà di u 5 maghju un ghjornu di ricordu naziunale senza partite. Ùn si ghjucherà, che sè u 5 maghju casca in sabatu. U Ministru di i sport mesi fà, ha scupertu una lapide in Parigi, posta à u Ministeru in omaggiu à e vittime. Ha imprumessu dino d’urganizà inde e scole, ogni 5 maghju, infurmazione e dibattiti nanta e virtù di u sport.
A a ceremonia stu ghjovi di l’Ascensione in Furiani, ghjeranu presente e famiglie di e vittime, l’autorità lucale , i ripresententi di a legua naziunale di ballò, di a squadra di u Sporting Bastìa é centinaie d’anonimi u core strintu.
St’annu u Ministru di i sport Thierry Braillard ghjera presente à nome di u Guvernu. Po dassi una marca di bona vuluntà per dà suddisfazione cumpleta à u Culletivu?
———
Articulu é ritratti di Petru Luigi Alessandri
Petru Luigi Alessandri
Giornalista radiofonico di RCFM, si occupa tra l'altro anche della trasmissione Mediterradio, che mette in contatto gli ascoltatori di Corsica, Sardegna, Sicilia, e occasionalmente Malta e altre terre mediterranee. Per Corsica Oggi scrive in lingua corsa o, in traduzione, in italiano.