25esima ghjurnata di Serie A: u Milan piglia u primu postu, Inter-Napoli senza vincitori nè perdenti

Cridiste chì u campiunatu talianu di ballò un puvìa più dacci novi mutivi di passione pè sta battaglia pè u Scudetto? A a fine d’issa 25esima ghjurnata di Serie A una cosa hè certa: a sfida un hè ancu compia trà Milan, Inter è Napoli pè a vincinta finale. Eccu u riassuntu, in còrsu !

 

U primu postu hè rossonero

L’affissu principale di sta nova ghjurnata di sfide trà e squadre di a Serie A opponìa u primu di u campiunatu, l’Inter, à u secondu, u Napoli, in casa di i “partenopei”. Una scunfitta per unu o per l’altru sarìa stata una perdita di punti tremenda, forse fatale, ancu se rimane da a parte di l’Inter un’altra partita da ghjucà, e dunque trè punti supplementari possibili. Finalmente, nè unu nè l’atru esce vincitore o perdente, a partita compiendusi à punti pari, 1-1. Ghjè statu u Napoli à aprire u puntaghju cù Lorenzo Insigne (rigore, 7’). Ci vole aspettà l’iniziu di u secondu tempu per vede l’Inter reagì cù un tiru à segnu di Dzeko (47’).

Cusciente chì, cù stu risulatatu à punti pari trà Napoli è Inter, c’era tandu a pussibilità di piglià u primu postu, i rossoneri duvianu assicurà una vittoria contr’à a Sampdoria. Senza facilità, mà cù faccindaghjine, u Milan hà guadagnatu sti trè punti cù una vittoria 1-0. Ghjè Rafael Leao chì hà trovu i filetti di a Sampdoria (8’), nant’à una passa magnifica di 65 metri inviata da Mike Maignan, u portiere di u Milan.

U Milan piglia u primu postu di u campiunatu cù 55 punti, seguitadu da l’Inter (54 punti, una partita in menu) è da u Napoli (53 punti).

Sfide pè l’Europa: a Juventus intrappuleghja l’Atalanta, a Lazio seguita

E partite impurtante pè a seguita di u campiunatu eranu numerose pè sta 25esima ghjurnata, non solu in cima di a classifica. Lottendu inseme pè un postu qualificativu pè a Champions League, Atalanta è Juventus anu compiu à partita 1-1. I bergamaschi ponu esse dillusi: sò rimasti à 1-0 fine à l’ultime minute di a partita… Fina à u colpu di testa di Danillo (90’+2) chì trova i filetti di Sportiello è permette à a Juve di salvà u risultatu.

Daretu, a Lazio assicura u risultatu contr’à Bologna (3-0), mentre chì a Roma inciampa in Emilia-Romagna contr’à Sassuolo (2-2). Aspettendu sta sera u spostamentu di a Fiorentina in Liguria contr’à a squadra di La Spezia, ghjè l’Hellas Verona chì piglia l’ottesimu postu dopu à so vittoria netta in confronti di l’Udinese, 4-0.

L’altri risultati

U Genoa cume a Salernitana si perdenu sempre più prufondamente ind’è a zona di relegazione. E due squadre finiscemu u so scontru 1-1 à Marassi. Bonu risultatu pè Venezia chì hà vintu 1-2 contr’à u Torino. I veneziani sò sempre in zona di relegazione ma à punti pari cù Cagliari è sempre in attesa di ghjocà à so partita in ritardu. I sardi piglianu un puntu impurtante in Toscana contr’à Empoli è anu sempre una pussibilità di salvassi.

A classifica

Postu Squadra Punti
1 Milan 54
2 Inter* 53
3 Napoli 53
4 Juventus 46
5 Atalanta* 44
6 Lazio 42
7 Roma 40
8 Hellas Verona 36
9 Fiorentina** 36
10 Torino* 32
11 Empoli 31
12 Sassuolo 30
13 Bologna* 28
14 Udinese* 27
15 Spezia* 26
16 Sampdoria 23
17 Cagliari 21
18 Venezia* 21
19 Genoa 15
20 Salernitana* 12

 

*Una partita in menu

**Duie partite in menu