24esima ghjurnata di Serie A: Milan vince u derby, Napoli hè sempre più vicinu

Dopu una piccula settimana senza sfida di campiunatu, e squadre di a Serie A sò tornate per rigalacci, cume sempre, qualche partite di grande qualità. E sopratuttu una seguita di campiunatu appassiunante, cù trè squadre più che mai in lotta pè u Scudetto.

Trè squadre, duie città, un puntu

U “derby della Madonnina” hè sempre unu di i più grandi momenti di u campiunatu, ancu quandu e squadre milanese un eranu più a u livellu che si aspettava da elle. Ma forse quest’annu era veramente tornata a passione da una parte e l’altra, cù una squadra di l’Inter bè fissata à u sò primu postu, è un Milan prontu à falla cascà.

Cù una vittoria, l’Inter avia a pussibilità di guadagnà appena di spaziu nant’à u rivale rossonero, attempu à u Napoli, più che mai in corsa per vince u campiunatu. U primu tempu hè statu, inoltre, favurevule à i nerazzurri, ma trovanu sempre davanti à elli un Mike Maignan, portiere di u Milan, in piena forma. L’Inter riesce quantunque à tirà à segnu cù Perisic à l’39esimu minutu. Milan hè in difficultà ma l’Inter un riesce micca à cuncretizà un altru tiru à segnu, è u primu tempu finisce 1-0.

Ind’è a seconda partita di sfida, u Milan cumincia à mostrà rabbia e voglia di vincere. L’Inter resiste, fine à u 75esimu minutu: apprufittendu di un sbagliu à metà campu di Alexis Sanchez, u Milan contrattacca è Olivier Giroud, sempre decisivu, rimette u cuntadore à punti pari (1-1). Infocata, a squadra rossonera riparte subitu à l’attaccu è bastanu solo quattru minute per vede ancora Olivier Giroud tirà à segnu (1-2, 79°).

Nonostante l’esclusione di Theo Hernandez ind’è l’ultime minute, u Milan riesce à vince u “Derby della Madonnina”, u primu dapoi duie anni. Cù sti trè punti, i rossoneri voltanu à un puntu di l’Inter in classifica (i nerazzurri anu quantunque una partita in menu). U periculu hè sempre più grandi pè i campioni d’Italia: eri u Napoli hà vintu in Venezia (0-2). A squadra campana piglia u secondu postu in classifica, à punti pari cù u Milan.

Vlahovic digià decisivu pè a Juve, l’Atalanta scuzzulata da Cagliari

Sta 24esima ghjurnata di Serie A hè stata sinonima di cambiamenti ind’è a metà alta di a classifica. A perdita à più pesante forse hè quella di l’Atalanta, scunfita in casa da a squadra di Cagliari (1-2) chi sorte cusì di a zona di relegazione. I bergamaschi lascianu u quartu postu à a Juventus, chi ospitava l’Hellas Verona.

Qualchi ghjorni fa, a Juventus hà compru u ghjucatore serbu Dusan Vlahovic da a Fiorentina per circa 70 milioni di euro. Un hà tantu aspettatu pè dimostrà chi, nonostante u cambiamentu di culori per quelle di u nemicu storicu di a Fiorentina, Vlahovic hè un “sniper” nato: hè unu di l’artisgiani di a vittoria di a Juventus 2-0 contr’à l’Hellas Verona.

Da a parte di a Fiorentina, si hè già sentita a sferenza. Ormai senza Vlahovic, i Viola sò stati puniti da a Lazio Roma (0-3) à l’Artemio Franchi, è anu da accuntentassi di l’ottesimu postu. Cù sta vittoria, i laziali piglianu u sestu postu, à punti pari (39) cù l’AS Roma chi non hè riesciuta à truvà i filetti di u Genoa (0-0). A squadra ligura hè sempre persa ind’è a zona di relegazione, penultima cù 14 punti.

L’altri risultati

Bella vittoria di a Sampdoria, chì scrasa Sassuolo 4-0 à Marassi è si allontana da a zona di relegazione. Ancu l’Udinese si dà appena d’aria cù una vittoria 2-0 contr’à u Torino, mentre chi Empoli è Bologna anu compitu a partita 0-0.

Stasera si ghjoca l’ultima partita di sta 24esima ghjurnata trà Salernitana è Spezia.

A classifica