11 nuvembre: U ricordu vivu di “I Zitelli“ dopu più di un seculu

L’11 nuvembre custituisce sempre in Corsica un mumentu impurtente malgratu i 106 anni passati dipoi a firma di l’armistiziu chi mettìa fine à a guerra di 14/18. In ogni paese di l’isula si alza un munimentu di u ricordu. Ghjè di stu periodu di u dopu guerra che i nomi di i morti di a “grende guerra” sò stati sculpiti indè i marmuri, o e petre di lapide di u ricordu.

Più di 11.000 giovani sullati corsi cascati per ste francie. Indè e terre umide è ghjaciate di l’Este è di u Nordu. Quasi tutti ùn cunniscianu che e pascurre muntagnose, i castagnetti frescosi o e piaghje zinzalate, l’orti à fian’ di colli o a bor’ di fiumi  di i so paesi piatti da e machje umbrose. Parechji ùn avianu cume lingua che u corsu è pocu francese. Quandu e campane anu cicunatu in stu ghjornu d’agostu 14 per annunzià a mubilisazione generale, e moglie, e surelle, e mamme anu corsu per strade è stradoni, anu pigliatu i chjassi di l’estive per purtà a nutizia. Tutti anu lasciatu i so campi e i so fargoni, abbandunnatu capre, pecure è porchi, lasciatu in pianu i casali in sumente per raghjunghje Corti, Bastia o Aiacciu è dopu francà u mare. A Corsica s’hè spenta di a luce di ste millaie di giovani chi l’arrichìanu. Pocu à pocu l’isula s’hè strinta cume una lapara piscatta, priva che l’ha era di l’energìa di à so giuventù. È c’hè vulsutu decenni per che la riculessi à gallu.

Oghje sempre e ferrite di 14/18 ùn si sò ancu cumpletamente chjose. 100 anni sò pochi, e ste vite arrubate campanu sempre indè e nostre mente. Simu sempre parechji à ricurdacci di i racconti à u frescu di e serate di statine, di quelli chi eranu rientrati. Testimunienze ascultate in silenziu nant’u e piazza di i nostri paesi o di e nostre cità, i nostri ochji sburladi di zitelli o di giuvanotti ,fissati versu sti visi chi ci facianu campà una guerra maladetta. RCFM indè l’annate 1980 ha indè parechje trasmissione, fattu vive u parcorsu di sta guerra in Corsica ricugliendu testimunienze di l’ultimi  sullati è di quelli o quelle chi avianu campatu sta storia. Una pruduzzione cundutta da Petru Mari. Hè, perciò, che l’11 nuvembre in Corsica pussede sempre una forza d’emuzione, di primura perche 14/18 s’hè arradicatu cume un pezzu strintu à u core di a nostra storia.

Ceremonia sulenne in Bastia

In stu 11 nuvembre a Corsica s’hè ricurdata. Parechje cerimonie sò state urganizate di fronte à i munimenti di u ricordu indè tutte e cità di l’isula è ind’i paesi. In Bastia piazza Santu Niculà, a ceremonia hè stata sulenne. Persunnalità civile, militare, ripresententi di l’associi d’anziani cumbattenti, sculari e numerosi bastiacci si so aduniti à u munimentu à i morti. Ceremonia rialzata da a presenza di militari di parechji regimenti, armata di l’aria, gendarmi, spenghji fochi è una delegazione impurtente di a legione strangera di Calvi chi ha sfilatu sott’applausi furniti.

Ceremonia piena d’emuzione è di raccolta, in onore di “i zitelli” cume lu si chjamava i sullati di u 173, regimentu induvè i corsi ghjeranu in maggiurità. L’ultimu a rientrà indè à so terra ghjè statu Virgo Luigi di a Casabianca, fucillatu per fà esempiù in 1916, allora che l’avia cumbattutu  valorosamente à Verdun. Oramai è so gennere riposanu in Castagniccia dopu 108 anni in terra musellana. Eccu cume a storia accorta l’anni per diventà malgratu u seculu dinò oghjincà.

Petru Luigi Alessandri